მართლმადიდებელი ეკლესია დღეს იერუსალიმში მაცხოვრის დიდებით შესვლას — ბზობის დღესასწაულს აღნიშნავს. ამასთან დაკავშირებით, ქვეყნის მასშტაბით ტაძრებში საზეიმო წირვა-ლოცვა სრულდება.

ბზობა დიდმარხვის მეექვსე კვირას აღინიშნება და ქრისტიანული სამყაროს ერთ-ერთი მნიშვნელოვანი მოძრავი დღესასწაულია. იგი ყოველთვის ბრწყინვალე აღდგომის წინა კვირა დღეს ემთხვევა და ასახავს იმ მოვლენას, როდესაც იესო ქრისტე დიდებით შევიდა იერუსალიმში.

საეკლესიო ტრადიციის მიხედვით, ბზობის დღეს მორწმუნეები ეკლესიაში მიდიან, ესწრებიან წირვა-ლოცვას და ბზას აკურთხებენ. წინა წლის ნაკურთხი ბზა კი ამ დღეს სახლიდან გამოაქვთ და ეკლესიის ეზოში სპეციალურად გამოყოფილ ადგილას ტოვებენ ან „სუფთა“ ადგილზე წვავენ.

დღესასწაული განსაკუთრებულ სიხარულთან არის დაკავშირებული, რადგან ქრისტეს იერუსალიმში შესვლას ხალხი ზეიმით შეხვდა. წმინდა წერილის თანახმად, მას როგორც მხსნელსა და მეფეს, გზაზე პალმისა და ბზის რტოებს უფენდნენ, ზოგიერთები კი საკუთარ სამოსსაც უგებდნენ და ოვაციებით ეგებებოდნენ.

ამავე დროს, ბზობა სიხარულთან ერთად გარკვეულ სევდასაც უკავშირდება — ეკლესია მორწმუნეებს ახსენებს, რომ იმავე ხალხმა, რომელმაც მაცხოვარი ასეთი დიდებით მიიღო, სულ რამდენიმე დღეში უარყო და გასამართლებლად გასწირა.

სახარების მიხედვით, იერუსალიმში შესვლისას ბავშვებიც კი, რომელთაც ჯერ მეტყველება არ შეეძლოთ, ხმამაღლა ადიდებდნენ მაცხოვარს სიტყვებით: „ოსანა, ძესა დავითისა! კურთხეულ არს მომავალი სახელითა უფლისათა!“ ფარისევლები კი ცდილობდნენ მათი დადუმებას, რაზეც ქრისტემ უპასუხა, რომ თუ ისინი დადუმდებოდნენ, თავად ქვები დაიწყებდნენ ღაღადს.

სასულიერო პირები აღნიშნავენ, რომ ბზობა მხოლოდ ნაკურთხი ბზის სახლში მიტანა არ არის — მნიშვნელოვანია, მორწმუნემ გააცნობიეროს ამ დღესასწაულის სულიერი არსი და მნიშვნელობა.

ბზობის დღეს ეკლესიებში იკითხება დღესასწაულის ტროპარი და კონდაკი, რომლებიც მაცხოვრის დიდებით შესვლასა და მისი გამარჯვების მნიშვნელობას ასახავს.

ბზობა აღდგომის დღესასწაულის მოახლოების ერთ-ერთი მთავარი ნიშნულია და მორწმუნეებს სულიერი განახლებისა და მომავალი ბრწყინვალე დღესასწაულისთვის მომზადებისკენ მოუწოდებს.

წყარო: primetime.ge

ხვიჩა კვარაცხელია​​​​